WAKATI GANI NI SAHIHI KUANZA UHUSIANO UPYA WA MAPENZI ?

Mapenzi ni furaha haswa pale unapompata mtu sahihi na kwa wakati sahihi.  Hata hivyo kama ulishaumizwa katika mahusiano hapo kabla , inaweza kuwa ngumu sana kujua kama upo tayari kuingia katika uhusiano mwingine.

Wasiwasi, woga na kutokujua kama upo tayari kwa mahusiano mapya kunaweza kutokana na uzoefu wako wa mahusiano yako yaliyopita, au mapungufu yako mengine ambayo kupitia uhusiano wako uliopita umegundua na hivyo kujiwekea wakati mgumu wa kujiamini na kutaka kuanza mahusiano mapya

Kwa wadada kama mimi kuanza mahusiano mapya kunaweza kuwa kugumu uwe na ujauzito na hatimaye kujifungua mtoto, sasa unajiuliza kama huyo mpenzi mpya atakukubali wewe pamoja na mtoto wako. Na sio tuu kukukubali wewe na mtoto au watoto, bali zaidi sana kukubali historia yako na kwamba sasa umejifunza na unataka kuwa mtu bora Zaidi.

Ukitafakari na kuelewa kuwa mapenzi ni zaidi ya hisia za mwili, kwamba mapenzi ni watu wawili wapendanao wanaamua kujenga ushirika ili kwa pamoja waweze kufikia ndoto binafsi na pia kujenga ndoto za pamoja na kuishi thamani haswa ya maisha ambayo ni kushare na mtu mambo mengi, muda na hisia za kimapenzi, ukitafakari hivyo, unajikuta unakaribia kufikia jibu la wakati gani ni sahihi kuanza mahusiano mapya.

Kwa upande wangu sioni jibu la moja kwa muda kwamba wakati gani ni sahihi. Kwani wakati kuwa sahihi haitegemei tuu wewe kama wewe, inategemea pia huyo utakayekua nae.

Nijuacho mie ni kuwa :

1.Kutoingia kwenye uhusiano mpya eti kwa sababu unataka kumsahau huyo mpenzi wako aliyepita. Huo hautokua wakati sahihi.

2.Kutoingia kwenye uhusiano mpya eti kwakua unapata presha toka kwa wazazi, marafiki , au ndugu kuwa muda umefika wa wewe kuwa na mpenzi au ndoa.

3.Kutoingia kwenye uhusiano mpya eti kwakuwa unajisikia tuu mpweke, hivyo unahitaji “kampani”

4.Kutoingia kwenye uhusiano mpya eti kwakuwa una matatizo ya kifedha, au unatafuta ajira , n.k

Kingine ni kuwa:

Tumia muda wa kutosha toka uhusiano uliopita hadi uhusiano mpya. Usianze mahusiano mapya kwa ghafla. Tumia muda wa kutosha kuwa peke yako, ukijihoji na kutafakari nini haswa unataka katika uhusiano mpya. Jifunze kutoka katika mahusiano yako yaliyopita, jifunze toka katika mahusiano ya watu wengine.

Endelea kufanya mawasiliano na watu wa jinsia nyingine ukichunguza kwa makini katika mazungumzo na mwonekano wa watu hao wa jinsia tofauti ni yupi anaweza haswa kuwa mpenzi wako mpya. Penda kujua zaidi kuhusu yule utakayemuona ana muelekeo wa aina ya mwanaume au mwanamke unayemtaka.

Fanya urafiki wa muda mrefu, hapa namaanisha msiwe wapenzi. Muwe kwanza marafiki na huyo utakayekuwa umemchunguza na kumuona ana sifa unazotaka. Hata hivyo usijekata tamaa, kuna mambo mengi huwezi jifunza toka kwa rafiki mpaka muwe wapenzi.

Sasa zamu yako wewe msomaji, je wewe unafikiri ni muda gani muafaka wa kuanza mahusiano mapya ?